O medo pode bloquear o que sente
O non darse as situacións anteriores, é moi frecuente que poidan bloquear o que senten ou expresan para adaptarse ás esixencias da contorna (sobre todo da familia á que non quere defraudar). Este bloqueo é o primeiro paso para unha posterior confusión sobre quen son realmente. Co tempo, vai a reaparecer a dúbida sobre a verdadeira identidade. Neste momento, no que xa é mais maior, aparecen os medos:
- medo ao rexeitamento e/ou cuestionamento por parte da familia. Isto adoita estar baseado en críticas-comentarios normativos e/ou LGTBIfóbicos que ten escoitado por parte da familia.
- medo a facer sufrir a súa familia coas súas decisións.
- medo a engadir máis preocupacións á súa vida e a da familia (si xa hai algunha outra fonte de preocupación como falla de traballo, problemas de cartos, falta de saúde, mala relación na parella,…)
- medo ao rexeitamento da contorna, sobre todo da aula ou centro educativo.
- medo a perdelo todo: o agarimo de toda a familia (nuclear e extensa), das amizades, a parella, o traballo, a non ter unha vida plena…
Falamos, por tanto, dunha persoa que leva tempo negando o que é, cunha mochila chea e pesada, con moitos sentimentos e pensamentos que necesita liberar para poder ser. Ainda así, o medo pode paralizar e fai que moitas persoas trans pospoñan e oculten a súa verdadeira identidade, as veces durante anos, o que provocará que medren conformando a súa identidade como persoa desde a negación, o ocultamento, a culpabilidade e o propio rexeitamento persoal.
Por tanto, é importante que como familias cando recibamos a noticia, sexa cando sexa, debemos mostrar moita empatía e comprensión ante algo moi importante que non é sinxelo para ninguén.
Si xa houbo esta comunicación e invalidácheslle ou xulgaches a súa identidade polo teu descoñecemento, estás a tempo de rectificar e pedirlle que che explique de novo todo o seu proceso e como podes axudar e acompañar a partir de hoxe. Dille que estiveches buscando información, que eres consciente de que non reaccionaches da mellor das maneiras, pero que queres facelo ben respetando todas as súas decisións.
